Thursday, March 1, 2012

കോഫി ഷോപ്പ്

ഓരോ തകര്‍ച്ച‍ക്കും ശേഷം ഞാ,നെന്നെ വിളിച്ചു കൊണ്ട്
ഒരു കോഫി ഷോപ്പില്‍ പോയി ഇരിക്കും.
ഇല്ല, ഇനിയും സമയമുണ്ട്, ഞാ,നെന്‍റെ തോളില്‍ തട്ടും
വെയ്റ്ററ്ക്ക് വെറുതെ ടിപ്പ് കൊടുക്കും
അയാള്‍ എന്നെയും, പിന്നെ എന്നെയും നോക്കി
ചെറുതായി ചിരിക്കും
ഒരിക്കല്‍ വെയ്റ്റര്‍ പറഞ്ഞു, എന്നും ഡ്യൂട്ടി തീരുമ്പോള്‍
ഞാനുമിതു തന്നെയാണു പതിവ്.
എന്‍റെ തോളില്‍ തട്ടാന്‍ വേറെ ആരെയും കിട്ടാനില്ലെന്ന്
ഗദ്ഗദത്തോടെ ഞാന്‍ അയാളോട് പറഞ്ഞു.
നെഞ്ചിന്‍റെ ഗുഹയ്ക്കുള്ളില്‍ 'നമ്മള്‍ തമ്മില്‍' മാത്രമാണു
കാര്യവിചാരമെന്ന് അയാള്‍.
ഞാ, നെന്‍റെ തോളത്തു തട്ടാത്ത ദിവസമായിരിക്കും
അവനിനി വരില്ലെന്ന് നിങ്ങള്‍ പറയുക.